執拾電腦檔案，偶爾翻閱十多年前網誌舊帖和留言，有些爛gag頗逗趣，現在選些重貼懷舊，輕鬆一下，順向歸隱故交致敬。Salute。
Yahoo Blog (2009/04/20)
【月事】
原擬定每月一帖，為網界立心，為模民立命，為往性繼絕學，為地球開太平；奈何歲月匆匆，小貴不意間已晉更年阿坑之期，月事不暢，儘管情感烈如火、思辨疾如風，唯筆桿子不動如山，欲扑（blog）無力，故摺扑聊充小隱，少談月事。便秘者可用甘油條，月秘者可用乜？未知誰人可舉建議，教小貴重享月事之樂？
舉筆唯艱，偉論即減，月事帖或成季事帖、年事帖，實令網民共哀，可小貴有不忍人之心（註），故當見別處有可議文章或啟發者，會列其連結於此，供方家溯跡品評，以濟饑渴。納納雜雜，本帖故稱《雜錦》，更新不輟。謹告。又，各路粉絲不妨考慮啟動ＲＳＳ，本扑季事帖即會自動通知，不必心思思常訪。
註：不忍人之心，即不忍見人受苦受害之心，語出孟子。恐倭人蟲師鬼太郎大人多說英語而不諳漢語典故本義，誤為「對人無耐性兼夾唔抵得人地叻過自己」之謂，故註。
Yahoo Blog (2010/05/06)
【睇醫生】
順蟲大人意，睇過醫生。醫生話我人老眼矇，對Ｄ雞毛蒜皮野易忘記，其實係絕對正常；佢話佢有時都忘記收病人診金；佢又話，除非係研究型學者，普通人愛記實丁豉野反而係病喎。
醫生仲即時叫我做咗100題邏輯推理，得分81，佢話正常人得分係80-120，超出120係屬高智，我有81，完全合格，絕唔係老人痴呆，而只係比人蠢Ｄ嘅一個正常人。佢再三強調，人老會易對零碎閒事忘失，係自然，毋須食藥。
我話唔係哩，醫生，我個網友話我一定要食，佢話我以前「英明神武、玉樹臨風、風流瀟灑、博聞強記、過目不忘」，而家就好唔掂喎。醫生話：阿貴，我做咗你家庭醫生卅年，你一向都係又蠢又戇居，點會係乜野「英明神武...博聞強記」呢？你朋友個腦袋係咪...唔...你不如叫佢嚟睇下我先啦。
醫生又問：你個朋友有乜行為特徵呀？我答：佢鍾意飲三鞭酒當水。醫生話：就係囉，唔怪得你朋友事事都咁堅持同執著啦，三鞭酒會令人嘅心智、情緒同器官都扯到衡咖，你叫佢嚟見下我啦。
我再問醫生：真係唔使食藥？少少都好吖，或者打枝針吖？佢話：新嘅老人痴呆藥好貴，要留返畀中大前校長高焜先生咖。你係蠢啫，唔係老人痴呆；蠢係無藥醫咖。
然後醫生熱烈咁同我握手，送我出診所。之後我用唔記得畀嘅丁豉500蚊診金開開心心咁去咗食日本料理。驚哩件雞毛蒜皮嘅事又忘失，在此一記。
