粵語能登正統之堂嗎？

香港電台節目，《五夜講場 - 文學放得開 2018：粵難愈愛》。

又係討論粵語，原以為都係重複近年的憂慮主調，點知聽下聽下，反而樂觀了。

論者提到大陸醫學雜誌一篇學術論文，研究粵語發音所引起的鼻咽黏膜振動、增生，可能係構成鼻咽癌的原因之一，其荒謬之論，逗人恥笑。有「牛鬼蛇神」意欲醜化粵語，以普代粵的政策無孔不入。

粵語入文當然可以，粗口寫blog也可以，民間塗鴉係個人的自由選擇，政府目前似乎管不了。粵語入文的典型例子，離不開舉六七十年代報章的三蘇專欄，夾雜白話、粵語、文言，是為「三及第」風格，如若加埋英文，完全是今日的港式語言了。另外，小說中人物的對白，直錄口語俗語，亦係等閒事。

但粵語詞彙、語法，可唔可以媲美語體文，成為正統書面語之一，我本來認為幾難，主要在粵語口語重，俗，語氣助詞豐富，情蘊多姿，易令人感覺言者好媚、輕佻、縱情之類，跟傳統儒家所主張規行矩步兼內斂的禮教不大相容，粵語似乎不易端莊雅化，然後為君子淑女所認同，君子淑女不認同，唔選用，粵語很難躋身書寫正統；然而教我驚喜係，主持人鄧小樺引用飲江的新詩《人皆有上帝》，我不禁拍案叫絕，粵語入詩有咁嘅藝術效果，不屑韁鎖，清新棒喝，直接說中心靈之痛，譬如詩中短句「係你自己攞黎嘅」，語體字幕翻成雅言「咎由自取」，有活該、抵你死的語意，但其實「係你自己攞黎嘅」係平描，以「嘅」字抒解慨嘆，全句雖保留自找麻煩之意，卻無罪有應得的指摘，連起後句耶穌聆聽之言，宗教的憐憫和救贖之情，隱然泛起，所生情意比起用雅言深厚動人得多。

《人皆有上帝》多年前我在小樺blogspot讀過節錄，當時心頭一震，一來詩中口粵入文不守婆媽成規，二來詩的首兩句脫胎自悲曲《天倫歌》（人皆有父，翳我獨無？人皆有母，翳我獨無？…），是我中學音樂課的曲子，所以很能觸動舊情。此詩今日再讀，我有更多體會。粵語書寫並不輸蝕。

《人皆有上帝》／飲江
https://www.douban.com/note/96239271/

順道講講，小樺提到粵語九聲，以東(dung1)字為正例，但坊間很多人以為每個粵語字都可調出九聲，是誤解。當字有鼻音韻尾-m、-n、-ng，才有入聲字，分別轉以-p、-t、-k為韻尾收音，才可以調出第七、八、九聲。譬如維基【香港粵語】的「九聲範例口訣」，列有「詩」(si1)的九聲：詩、史、試、時、市、事、色、(錫)、食，其實不當，「詩」以-i為韻，並無第七、八、九聲。入聲字色(sik1)（第七聲）、(錫) (sik3)（第八聲）、食(sik6)（第九聲），本字其實是「升」(sing1)。

就此打住。《粵難愈愛》，去片。

老外學粵語，一樣惦。北京啲官，就努力醜化粵語，務必以普代粵；而香港啲官，就連自己母語都唔認。算了，笑陣先，去片。

"Embarrassing stories with The Cantonese Guy"